CCXX.

1350, Juli 16. Breslau.

Schiedsspruch des Officials Andreas von Rasslawitz über die Zehnten in Guhlau und Kittelau.

In nomine domini amen. Cum coram nobis Andrea de Rasslawicz, canonico et officiali Wratislaviensi, inter partes subscriptas, videlicet magistrum Johannem de Grudencz procuratorem et procuratorio nomine agentem religiosorum virorum dominorum . . abbatis et conventus mona­sterii in Camencz ordinis Cysterciensis parte ex una, ac strennuum virum Cunadum de Porsnicz reum, parte ex altera, supra infrascripto libello materia questionis esset exorta; cuius tenor sequitur in hec verba: Coram vobis honorabili viro, domino Andrea officiali Wrat., proponit Johannes de Grudencz procurator et nomine procuratorio dominorum abbatis et conventus monasterii in Camencz contra Cunadum dictum de Porsnicz in iure et dicit, quod, cum de septem mansis et de quinque et dimidio mansis agrorum suorum et allodii in Gola et octo mansis agrorum in villa Kythlin, decimam campestrem de anno domini MoCCCo quinquagesimo ad dictum monasterium ab antiquo pertinentem ad horreum dicti Cunadi et de ipsius beneplacito et consensu prefati abbatis et conventus duci fecissent et duxissent, et licet ipsam decimam ex­triturassent et extriturari procurassent ipsorum sumptibus et expensis, idem tamen Cunadus sua temeritate propria pabulum, quod de dicta decima provenit, vi recepit de ipso horreo et cum suis animalibus expendit et consumpsit, quod pabulum communi estimatione valuisset ac valere potuisset tres marcas grossorum pecunie usualis. Cum autem idem Cunadus de huiusmodi pabulo eidem . . abbati et conventui satisfacere contradicit et recusat, petit dictus procurator nomine, quo supra, prefatum Cunadum conpelli ad solvendum ipsis . . abbati et conventui tres marcas ratione huiusmodi pabuli et conpellendum fore, decerni sententia diffinitiva vestra mediante. Insuper petit dictus procurator nomine, quo supra, per vos pronunciari ac declarari, prefatos abbatem et conventum libere posse sine contradictione cuiuscumque ducere, quo volunt, decimam campestrem de agris predictis provenientem. Premissa petit meliori modo et forma, quibus potest, cum litis expensis iam factis et de faciendis, protestor aliis etiam iuris beneficiis reser­vatis. Ad quem libellum in modum litis contestationis responsio fuit sub hiis verbis:
Coram vobis honorabili viro domino Andrea canonico et officiali Wrat. ego Laurentius pro­curator et procuratorio nomine domini Cunadi de Porsnicz, domini ville de Gola ad petitionem domini . . abbatis et conventus monasterii in Camencz animo litem contestando, nego narrata, prout narrantur in petitione et posito, sed non concesso, si aliquid in contrarium probaretur, excipiendo dico, quod dominus abbas et conventus predicti de tot mansis, de quibus petunt ibidem Gola, decimam habere non possunt ex eo, quia ibi tot mansi non sunt, de quibus decimam petunt et posito, sed non concesso, quod si tot mansi ibidem essent, quod non credo, tamen tota decima de eisdem mansis ad ipsas non pertinet, sed media pars vel paulo minus pertinet in Nympcz ad ecclesiam parrochialem. Item, ut supra, dico et nego narrata, prout narrantur de allodio Kytlin, quod ipsas abbatem et conventum in decimis ibidem, si aliquas habent vel habere dino­scuntur, ipse dominus Cunadus per se vel per alium impedire vel turbare unquam intendit vel inpedivit; de pabulo vero, quod idem dominus abbas et suus conventus ab ipso domino Cunado petiverant et adhuc petunt et estimant ad tres marcas; ut supra animo litem contestandi, nego de tot mansis et suum horreum conduxisse et tres marcas valuisse, et si aliquod pabulum idem dominus . . abbas et suus conventus ad horreum suum et ad comodum suum condusit, dico nomine, quo supra, quod idem pabulum pro censu horrei et pro grani servatione et pro comodo et hospitio et expensis, quod abbas et suus conventus cum familia sua habuit, tota messe vix dictum pabulum valuit, ymmo ipse dominus Cunadus pro censu dicti horrei, expensis, comodo dictorum servitorum dicti . . abbatis et conventus ultra dictum pabulum et valorem ipsius unam marcam census habuisset, quod suo tempore nomine, quo supra, affert me probaturum. Quare dico, petita fieri non debere et nichilominus peto ipsum dominum abbatem et suum conventum ad satisfaciendum de censu horrei, de expensis servitorum suorum et de censu granarii, quod tempore messis habuerunt et consumpserunt, quod estimat ad tres marcas, nomine, quo supra, ipsi domino Cunado per sententiam vestram compelli compellendos fore decerni. Et hec peto meliori modo et forma, quibus possum, cum litis expensis et protestor de faciendis iuris bene­ficiis in omnibus sibi salvis. Qua responsione sive litis contestatione facta prestitoque calumpnie iuramento hinc inde quedam excepto in modum replicationis, una cum positionibus et articulis pro parte dicti abbatis et conventus oblate fuerunt, super negatis vero testes inducti et examinati iuxta morem et ritum testium examinandorum, quibus examinatis et eorum attestationibus publi­catis, quedam exceptiones contra dicta et personas ipsorum oblate fuerunt, non tamen in termino ad hoc statuto, prout pars dictorum . . abbatis et conventus asserebat. Demum in dicta causa conclusum extitit hinc et inde. Visis igitur et intellectis dicte cause meritis et auditis hinc inde propositis et eis equa iustitie lance discussis, habita insuper deliberatione nobiscum et cum peritis diligenti partibus seu ipsarum partium procuratoribus in nostra presentia constitutis et sententiam ferri postulantibus, dei nomine invocato, prefatum Cunadum de Porsnicz dicimus et pronunciamus conpellendum ad solutionem trium marcarum ratione pabuli consumpti per ipsum sententialiter et diffinitive in hiis scriptis. Item pronunciamus, quod idem . . abbas cum suo conventu pre­dictam decimam seu decimas libere ducere valeat, quocunque voluerit, absque omni inpedimento seu contradictione cuiuscunque, quo ad alia, dictum Cunadum absolventes, condemnapcionem etiam expensarum cum propter defectuosam probationem, quam propter bonum pacis obmittendo. Qua quidem sententia prolata, dominus Laurentius Wackronis procurator et procuratorio nomine dicti Cunadi de Porsnicz mox ibidem ipsam sententiam, in quantum pro parte sua facit, approbans, in quantum vero contra, ab ipsa ad sedem apostolicam viva voce extitit appellatum et apostoli cum debita iuris instantia postulati. Lecta et in scriptis lata est hec sententia per nos Andream officialem supra dictum pro tribunali sedentem in consistorio nostro Wrat. in loco, ubi hominibus communiter iura redduntur, XVI° Kalendas Iulii, anno domini millesimo trecentesimo quinqua­gesimo; presentibus discretis viris: magistris Beldone de Proskow, Johanne de Grudencz et Johanne Conplath, advocatis dicti nostri consistorii Wrat., necnon Petro et Georgio dictis de Franckenstein fratribus, Petro de Bolezlavia et Johanne Modelici nostro, notariis publicis aliis­que pluribus testibus fide dignis. In cuius rei testimonium sigillum nostrum presenti sententie est appensum.

Or. Perg. Das beschädigte S. des Officials an einem Pergamentstreifen (s. No. CXCVII.).

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.